| |
Nasjonalparkfestivalen i Skjåk er over for i år
Vi takkar alle deltakarar, gjestar, friviljuge, medhjelparar og andre for ei god gjennomføring av den aller fyrste nasjonalparkfestivalen. Fylg med på denne sida. Her vil det kome bileter og film frå årets festival.
Velkomen attende til Nasjonalparkfestivalen i Skjåk i 2012!
Nasjonalparkfestivalen
Skjåk er landets største nasjonalparkkommune, og dette vil vi feire 10 dagar til ende med den aller fyrste Nasjonalparkfestivalen. Festivalen skal syne bydga sitt store mangdfald i natur og kultur i seks ulike arenar. Sjå deg rundt på heimesida og la deg freiste av dei mange aktivitetane og arrangementa vi har å by på!
Velkomen til Skjåk!
Arena Bruk av fjellet
Så lenge det har budd folk i fjellbygda Skjåk, har fjellet spelt ei sentral rolle for busetnad, livsgrunnlag og trivnad. For dei fyrste menneskja som kom her var fjellet og villreinen heilt avgjerande. Det er naturleg at bruk av fjellet kjem i fokus under den fyrste Nasjonalparkfestivalen. Dette året konsentrerer vi oss om jakt og fangst. Det blir bogeskyting, elgbaneskyting, moglegheit for å avlegge skyteprøve, utstillingar og foredrag.
Arena Fiske
I Skjåk kan du fiske i over 230 vatn og 200 km fiskeførande elver med eit fiskekort, og fiskemoglegheitene er nærmast uendelege! Den beste månaden for fjellfiske i Skjåk er nettopp i august under Nasjonalparkfestivalen.
I den fyrste helga under festivalen er det fullt fokus på fiske, med arrangement særleg retta mot familiefiske, men også fiskekonkurranse for sportsfiskarar med flotte premiar. Under Fiskepuben på Pollfoss og Afterfish på Grotli møter du andre fiskeinteresserte.
Arena Kultur
Humor står på programmet under Nasjonalparkfestivalen. VIggo Sandvik skal vera med å opne det heile på Pollfoss fredagskvelden. Der blir det "Fishing i Skjåk" og andre godbitar.
På Ofossen Pub blir det "Vatn på mølla" eit heilkveld i ekte rorbustil. Arrangementet blir leia av Håkon Sveen alias n´Hjalmar.
Arena Pilgrim
Siste helga i festivalen blir det arrangert ei pilgrimshelg i Skjåk. Utgangspunktet er å kaste ljos over pilegrimsvandring og planen om å merke opp pilegrimsvegen til Selje og Sankt Sunniva heilagdomen som ligg der.
Arrangementet opnar om kvelden fredag den 19.august med konsert i Nordberg kyrkje. Laurdag den 20.august blir det pilegrimsseminar på Grotli høyfjellshotell. Sundag blir det vandring med teaterinnslag og messe på Vassvenda, ved gamle Strynsfjellsvegen.
Arena Tur
Skjåkfjella byr på fantastiske naturopplevingar. Her er naturen vakker og variert, og i den uberørte naturen ligg naturperlene på rekkje og rad. Klimaet er tørt og stabilt, og turmoglegheitene er mange.
Nasjonalparkfestivalen tek deg med til nokre av desse perlene.
Her kan ein delta med familien på spennande og lærerike kulturstigvandringar på Sota eller Aursjoen. Eller kva med ein tur over den spektakulære Føysstein kombinert med eit glimt av ekstrempadlarane i Tora?
Tverrådalskyrkja er ein topp som absolutt er verdt et besøk. For dei som ynskjer seg ein real topptur, er dette turen å vera med på!
Arena Vatn
Skjåk har mange elver og vatn, så her ligg det godt tilrette for vassaktivitetar. Under Nasjonalparkfestivalen blir det arrangement både for ungar, familiar, ungdom og vaksne. Er ein ute etter spenning, og å kjenne at det kriblar litt ekstra i magen kan ein prøve seg på ein av dei mange vassaktivitetane. Rafting, juving, ducky, hydrospeed, kajakkurs og knøtteguidekurs er noko av det ein kan få med seg i løpet av dei 10 dagane.
Arena X-over
X-over camp er ein ungdomscamp for dei mellom 13 og 19 år fylt med spennande, morosame og utfordrande aktivitetar. Aktivitetar som ligg i grenselandet mellom det fysisk aktive og det kreative skapande. X-over campen byr på parkour, hip-hop, graffiti, capoeira, teatersport, fotball freestyle og filmproduksjon.
|
|
